婚禮公司因杯葛黑警遭恐嚇「藍絲嗌我哋返工要小心」

婚禮界最近靜靜起「革命」,至少250間婚禮公司在上月發起「我們一起罷」聲明,表明在成立獨立調查委員會前,決不為任何警務人員從事婚禮服務。有參與商戶因此得罪「亞洲最優秀」部隊,但仍拒絕妥協;「良知比收入重要」,有化妝師甘願犧牲一成多生意,認為丁點付出對前線被捕與受傷手足是微不足道。
記者:張文鈴


TY(右)稱,雖然他不足一成顧客是警察,但公開拒接警察生意聲明仍難免影響生意,惟他認為顧及員工感受亦很重要。謝榮耀攝
250間婚禮公司杯葛黑警的圖片搜尋結果
「立場唔同 拍攝效果會差」

TY是婚禮籌辦公司T. Art Wedding的總監,在反送中逆權運動前較少公開提及政治,但6.12當日,大批和平示威者聚集在中信大廈外,警方不理市民生死發射多枚催淚彈,「簡直好似謀殺,係中信大廈嘅情況係佢哋(警察)逼佢哋(市民)入死胡同、冇辦法走,好彩冇人命傷亡」。自此,TY恥與香港警察為伍。

「中信集會射彈不能接受」

TY解釋,中信大廈對出一帶舉行集會獲批不反對通知書,但警方仍發射催淚彈過去,「呢種武力完全唔對等嘅時候,令人好嬲」。他公司的員工也表明對警察這做法不能接受,不希望再為警察服務,因此他決定在6月14日公開發聲明。只有政府成立獨立調查委員會,警察願意承認過錯和負責任,公司才會重新接受警察的生意。

他的聲明是這樣說的,該公司對於警察於6月12日,在金鐘立法會外之暴力清場行動表示極為不滿。警方不斷施放多次胡椒噴霧、催淚彈、布袋彈以及橡膠子彈,以驅趕在場所有示威人士,甚至記者及紀錄攝影師。「如此過份之武力實在不必要,為此,本公司決定即時謝絕為所有香港警察服務」。新的拍攝預約將會要求填上職業,如果作出虛假陳述,一經發現將立即停止拍攝,亦不會退還定金,並向已預訂公司服務的警察安排退款。

雖然一年拍攝的新人中不足一成職業是警察,但公開拒接警察生意聲明難免會影響公司生意,不過TY說,縱使如此,顧及員工的感受亦都很重要,「做呢個決定係有考慮埋呢一點,但因為拍嘢需要同個客溝通好多,如果佢哋立場同我哋唔同,可能對事件有唔同睇法,拍出嚟效果可能會差少少」。

TY發表拒接警察生意聲明後,社交專頁被「藍絲」不斷留言攻擊,甚至恐嚇。互聯網

「藍絲嗌我哋返工要小心」

聲明後對生意未有太大影響,但社交專頁卻不停受到「藍絲」留言攻擊,例如「祝貴公司生意淡薄」、「開一間公司,都要學人搞政治」、「第日佢舖頭有咩事千祈唔好報警呀」等,「最過份係恐嚇話搵公司地址出嚟,嗌我哋返工要小心、會等你㗎」,TY坦言擔心員工和化妝師的安全,亦不時提醒他們要留意,幸好至今沒有任何事發生。

TY對香港未來不感樂觀,「因為政府一直逃避問題,唔去回應改變現時狀況」。每當他想到現時影響生意重要,還是香港和港人的未來重要,「呢個moment我會講,生意冇咗咪努力過,可以重新build up,但我生活嘅環境或畀我下一代嘅環境變咗,唔係我一個努力可以改變得到,所以我選擇做更多嘢去為自己將來」。他表明未來會繼續支持運動,但透露明年有離開香港的打算,將到加拿大留學,「未發生(運動)前已諗過香港問題,好多問題,尤其佔中後,𠵱家只係加速」。

7.21後無法為警察新人祝福

7.21元朗恐襲是香港人永不磨滅的傷痕,「太震撼,震撼到呢一世應該都唔會忘記嘅一件事」。從事新娘化妝的王小姐說,這場反送中逆權運動她都看在眼內,警察濫暴問題無日無之,在7.21元朗恐襲後更決定拒接警察生意,「比起上前線付出嘅示威者,我哋做嘅嘢(罷接警察生意)好微不足道」。她認為,良知比起收入更加重要,希望藉這小小行動令抗爭者知道他們並不孤單,「盡自己一分力想話畀人知,仲有一班人陪你,從事婚禮好多人好有良心」。

80後的王小姐從事新娘化妝師六年,她說:「做化妝嘅去到Big Day(結婚)嗰日,應該係全心全意咁幫一對新人,亦係見證佢哋人生最開心嘅一日」。自6月起反送中逆權運動,她與很多港人一樣平日工作,周末就會出席遊行集會。在7.21元朗恐襲後,她決定拒接警察生意。

「呢段時間(運動)有好多時間都未必瞓得着,但係要一早起身為你(警察)祝福,真係做唔到」,並以「道不同不相為謀」形容對警察的取態,又謂傳統觀念警察是維持治安,但至今眼見警察所作所為,「如果你話你職責係守護香港,但你用緊全港最大規模嘅武力工具去攻擊香港市民,我覺得我冇必要為佢哋服務」。

她續指,7.21元朗恐襲「太震撼,震撼到呢一世應該都唔會忘記嘅一件事」,當日她在港島參與遊行,食過晚飯後便趕搭港鐵尾班車回家,「搭車喺度睇直播,當時西環佢哋(抗爭者)衝擊緊中聯辦,心入面希望佢哋冇事,但另一個直播畫面係見住香港人打香港人,呢個係好難形容嘅一件事」。香港人這段時間很辛苦,每星期都要上街抗爭,明知是雞蛋對高牆,面對99%會輸的一場仗,大家仍無條件去付出。她哽咽地說:「𠵱家已經有好多手足犧牲,見到好多好細嘅小朋友去上街,有時會擔心佢哋食飽飯未呢」。
王小姐希望以行動令示威者知道他們並不孤單。

個人付出微不足道

王小姐於8月初在其專頁發表婚禮界罷工聲明,「我哋都叫屬於個人嘅工作,所以想盡自己一分力量去參與呢件事,話畀人(抗爭者)聽你唔係咁孤單,仲有一班人係可以陪你」。她指,其客源中有約一成是警察,「影響極都係十幾%,比起上前線付出嘅示威者,我哋做嘅嘢好微不足道……好似貴報老闆黎智英咁講,冇咗自由,賺幾多錢都冇用」。

攝影師:不應扮抗爭者拍照抽水

準新人在結婚前大都會拍攝婚照留念,在婚宴當日亦會供親友欣賞。惟本港近月經歷反送中逆權運動,社會籠罩沉鬱的氣氛,有準新人選擇打扮成抗爭者,戴上頭盔和豬嘴拍照,印證這個歷史時刻。不過,Studio Oak婚禮攝影師Iris表明不贊同這種做法,「如果你話想記錄當下社會發生嘅事,我會覺得你親身落去遊行,用你自己對眼記住」,又認為這種拍攝目的是為了「抽水」。

應嚴肅對待逆權運動

Iris表示,婚照可取材不同主題,但準新人戴上頭盔和豬嘴影婚照則不能接受,「因為香港人去遊行集會本應係自由同權利,但點解𠵱家我哋遊行要戴豬嘴同頭盔,而其實呢啲嘢唔係我哋想要,唔係一件開心嘅事,點解要擺喺pre wedding(婚攝)度呢?」她又指,「如果你話想記錄當下社會發生嘅事,我會覺得你親身落去遊行,用你自己對眼記住,因為你會記住好深嘅感受」,然後與下一代、身邊朋友,甚至海外朋友分享經歷。對她而言,拍攝這類型的婚攝目的是為了「抽水」。

她不點名批評有同行叫客人穿着校服、戴口罩,模仿早前中學生手拖手築成人鏈反暴政,「可能佢哋覺得好得意擺係pre wedding度影,但姑勿論係攝影師定客人要求,對我嚟講都係唔容許同不能原諒」。她說:「讀過中學都知中學生係學校講咩你要聽,家長講咩你要聽,因為當刻嘅人生同生活掌控喺家長同學校手中」,而中學生在今次運動中很勇敢,他們在學校內做不合作運動和聯校做人鏈作反抗,「佢哋做到嘅嘢好少,但都願意去做嘅時候,我哋應該支持,要嚴肅、認真嘅態度去對待」。


Iris認為中學生築人鏈反暴政是勇敢的表現,應以嚴肅態度對待。

 


來源:蘋果

以上內容皆為轉發,資料未經確實,只供備份參考。上述內容並不代表本站立場

 

Recent Articles

預算增加至258億開支 警方出片解釋:保護同事,確...

警隊下個財政年度預算增加至接近258億,較今年度的...

韓國人搶機票飛中國避肺炎! 中國人要求封關:「別再...

【武漢肺炎】的確診數字在韓國短時間內激增,現在確診...

林卓廷稱接警方來信 終止調查去年6月底政總外襲擊案...

立法會議員林卓廷收到警務處處長來信,指他在6月30...

梁美芬、佐級協會將對Youtuber、高登音樂台諷...

梁美芬今日(28日)再度召開記者會,指已聯絡涉事警...

Related Stories

close
搜尋